ივანე ჯავახიშვილის სახელობის თბილისის სახელმწიფო უნივერსიტეტში ჩატარდა ორდღიანი კონფერენცია თემაზე: „ჩინეთის როლი გლობალურ პოლიტიკაში მეორე მსოფლიო ომიდან დღემდე“. ღონისძიების ორგანიზატორები იყვნენ ჩინეთის სახალხო რესპუბლიკის საელჩო საქართველოში და „ჩინეთისა და სამხრეთ-აღმოსავლეთ აზიის კვლევის ცენტრი“.
კონფერენციას დაესწრნენ თსუ რექტორი, აკადემიკოსი ჯაბა სამუშია, ჩინეთის სახალხო რესპუბლიკის საგანგებო და სრულუფლებიანი ელჩი საქართველოში ჭოუ ციენი, „ჩინეთისა და სამხრეთ-აღმოსავლეთ აზიის კვლევის ცენტრის“ დირექტორი ბექა ნაცვლიშვილი და თსუ სინოლოგიის მიმართულების სტუდენტები.
ქართველმა და უცხოელმა მეცნიერებმა ვრცელი მოხსენებები წარადგინეს და განიხილეს რამდენიმე ფუნდამენტური საკითხი:
- ჩინეთის მსხვერპლი და აღმოსავლეთის ფრონტი: ხაზი გაესვა, რომ ჩინელმა ხალხმა, 35 მილიონზე მეტი მოქალაქის მსხვერპლის ფასად, შეინარჩუნა ანტიფაშისტური ომის მთავარი აღმოსავლეთის ფრონტი.
- დეკოლონიზაცია და სუვერენიტეტი: დეტალურად გაანალიზდა „დამცირების საუკუნის“ (1839-1949) დასრულება, უსამართლო ხელშეკრულებების გაუქმება და აზიაში კოლონიალური სისტემის ნგრევის ეტაპები.
- თანამედროვე გეოპოლიტიკა: მომხსენებლებმა იმსჯელეს მსოფლიო წესრიგის ტრანსფორმაციაზე — ერთპოლუსიანიდან მრავალპოლუსიან სისტემაზე გადასვლასა და ჩინეთის, როგორც გლობალური აქტორის როლზე თანამედროვე უსაფრთხოების კონტექსტში.
„კონფერენცია ეძღვნება მსოფლიო ანტიფაშისტურ ომში გამარჯვების 80-წლისთავს. აუცილებელია ასეთი კონფერენციის გამართვა იმისათვის, რომ შევახსენოთ ხალხს თუ რამდენად მნიშვნელოვანია მშვიდობა ჩვენი ქვეყნებისთვის. ისტორიას გავიხსენებთ როგორც გაკვეთილს და უფრო დავაფასებთ მშვიდობას“ — განაცხადა ელჩმა ჭოუ ციენმა.
თავის მხრივ, ბექა ნაცვლიშვილმა აღნიშნა: „ევროპულმა და პოსტსაბჭოთა საზოგადოებამ ნაკლებად იცის იმ ომის შესახებ, რომელსაც ჩინეთი აწარმოებდა აღმოსავლეთში მეორე მსოფლიო ომის დროს. დღევანდელი კონფერენციით ჩვენ ვცდილობთ, ეს მოვლენა უფრო მეტმა ხალხმა გაიგოს.“
საგულისხმოა, რომ თსუ-ში ჩინური ენა 2003 წლიდან ისწავლება, ხოლო 2007 წლიდან ფუნქციონირებს აღმოსავლეთის რეგიონმცოდნეობის მიმართულება (სინოლოგიისა და იაპონისტიკის განხრით). თსუ სტუდენტები წლების მანძილზე გადიან გრძელვადიან სტაჟირებებს ჩინეთის სხვადასხვა უნივერსიტეტში, რაც ხელს უწყობს ორ ქვეყანას შორის აკადემიური კავშირების გაღრმავებას
შეგიძლიათ იხილოთ კონფერენციის ფოტომასალა და ჩამოტვირთოთ მომხსენებლების გამოსვლების სრული ტექსტები PDF ფორმატში